പൊള്ളുന്ന പെട്രോള്‍ വില

      അടിക്കടി കൂടുന്ന പെട്രോള്‍ വിലയാണ് ഇപ്പോഴത്തെ പ്രധാന ചര്‍ച്ചാവിഷയം. സാധാരണ ജനങ്ങള്‍ക്ക്‌ താങ്ങാന്‍ പറ്റാത്ത നിലയിലേക്ക് എത്തിയിരിക്കുന്നു ഇപ്പോള്‍ തന്നെ വില. ഉടനെ വീണ്ടും കൂട്ടാനുള്ള നീക്കങ്ങള്‍ നടക്കുന്നതായുള്ള വാര്‍ത്തകള്‍ വന്നുകൊണ്ടും ഇരിക്കുന്നു. ഇത്ര നഷ്ട്ടം സഹിച്ചാണോ ഈ കമ്പനികള്‍ ഇത്രയും നാളും പെട്രോള്‍ വിറ്റിരുന്നത്? എന്നാല്‍ ഇവര്‍ പറയുന്ന നഷ്ട്ടങ്ങള്‍ ഒന്നും അവരുടെ വാര്‍ഷിക കണക്കില്‍ കാണുന്നുമില്ലല്ലോ. അതുപോലെ കമ്പനികള്‍ പറയുന്നു സര്‍ക്കാര്‍ പറഞ്ഞാല്‍ ഇപ്പോഴത്തെ വര്‍ധനവ്‌ പിന്‍വലിക്കാം എന്ന്. സര്‍ക്കാര്‍ പറയുന്നു ഇനിയും കൂട്ടേണ്ടതാണ്, കമ്പനികള്‍ അത്രക്കും നഷ്ട്ടത്തില്‍ ആണ് ഓടുന്നതെന്നും... പ്രണാബ് മുഖര്‍ജിയുടെ കണക്കുകള്‍ എന്തൊക്കെ തന്നെ ആണെങ്കിലും സര്‍ക്കാര്‍ ജനപക്ഷത്തു നില്‍ക്കെണ്ടതല്ലേ? കാരണം സര്‍ക്കാര്‍ ജനങ്ങളുടെ ആണല്ലോ. അതോ ഇനി മൂന്നാം തവണയും കയറ്റിവിടുവാന്‍ മാത്രം മണ്ടന്മാരല്ല ഇവിടുത്തെ ജനങ്ങള്‍, അപ്പോള്‍ എന്തും കാണിച്ചിട്ട് ഇറങ്ങിപ്പോകാം എന്ന ധാരണയോ? എന്തായാലും ഈ സര്‍ക്കാര്‍ അതിന്‍റെ ഏറ്റവും നാണംകെട്ട നാളുകളിലൂടെ കടന്നുപോയ്ക്കൊണ്ടിരിക്കുന്നു. എന്നാല്‍ ഇതിനെ പ്രധിരോധിക്കാന്‍, അല്ലെങ്കില്‍ അവസരം മുതലെടുക്കാനെങ്കിലും ശക്തിയും പ്രാപ്തിയും ഉള്ള ഒരു പ്രതിപക്ഷം ഉണ്ടോ ഇവിടെ? ഇതൊക്കെയാണ് നമ്മള്‍ പ്രജകളുടെ ദൌര്‍ഭാഗ്യവും. ഞാനൊരു പാര്‍ട്ടിപക്ഷത്തും നിന്നല്ല പറയുന്നത്. കാരണം നമ്മള്‍ എല്ലാവരെയും കണ്ടതാണല്ലോ.     

     ആധികാരികമായി കണക്കുകള്‍ വിശകലനം ചെയ്യുവാനൊന്നും അറിയില്ലെങ്കിലും ഒരു കാര്യം പറയാം. ഇത്രയും വില നമ്മുടെ അയല്‍രാജ്യങ്ങളില്‍ ഒരിടത്തും ഇല്ല. നമ്മുടെ അത്രയും വികസനം ഒന്നും കൊട്ടിഘോഷിക്കാന്‍ അവയില്‍ ചിലതിനു ഇല്ലെങ്കിലും. അല്ലെങ്കില്‍ സാധാരണക്കാരെ വീര്‍പ്പുമുട്ടിച്ചുകൊണ്ട്‌ എന്ത് വികസനം. ഈപ്പറഞ്ഞത്‌ തെറ്റായെങ്കില്‍ ക്ഷമിക്കുക. മറ്റു രാജ്യങ്ങളിലെ പെട്രോള്‍ വില ഒന്ന് ശ്രദ്ധിക്കുക. ഇത് കണ്ടിട്ട് എന്ത് തോന്നുന്നു??

ചൈന = 37.31
വിയെറ്റ്നാം = 38.42
USA = 39.64
ശ്രീലങ്ക = 44.51
അഫ്ഗാനിസ്ഥാന്‍ = 12.37
നൈജീരിയ = 16.63
മലേഷ്യ = 24.11
ഇറാന്‍ = 25.53
ഹോങ്ങോങ്ങ് = 29.86
ബംഗ്ലാദേശ് = 36.12
പാകിസ്ഥാന്‍ = 38.78
കെനിയ = 45.55
കാനഡ= 56.07
സൗത്ത്‌ കൊറിയ = 54.35
സൗത്ത്‌ ആഫ്രിക്ക  = 55.24
ഇന്ത്യ = 74.84
ബള്‍ഗേറിയ = 57.29
ന്യൂസിലാന്‍റ് = 57.36
ഓസ്ട്രേലിയ = 62.46
പോളണ്ട് = 62.48
സ്പെയിന്‍  = 64.58
സ്വിറ്റ്സര്‍ലന്‍ഡ് = 65.57
തായിലാന്‍റ് = 67.52
ജപ്പാന്‍ = 70.75
UAE = 18.14
ഖത്തര്‍ = 8.25
സൗദി = 8.53  
കുവൈറ്റ്‌ = 9.45 

(കടപ്പാട് :http://www.indiastudychannel.com/resources/ )

ലിറ്ററിന് 30 – 35 രൂപ മാത്രം വിലയുള്ള സാധനതിനാണ് നമ്മള്‍ ഇരട്ടിയിലധികം വില കൊടുത്ത് വാങ്ങിക്കുന്നത്. ബാക്കി മുഴുവനും നികുതിയാണത്രേ!!! ഇപ്പറഞ്ഞ നികുതി എന്ന സംഭവത്തിന്‍റെ നിയന്ത്രണം സര്‍ക്കാരിന്‍റെ കൈയ്യിലല്ലേ? കേരള ഹൈക്കോടതി പറഞ്ഞതുപോലെ ജനങ്ങള്‍ പ്രതികരിക്കാത്തതാണോ എല്ലാ പ്രശ്നങ്ങള്‍ക്കും കാരണം? അല്ലെങ്കില്‍ പാവം ജനത എങ്ങിനെ പ്രതികരിക്കും? എന്തിനൊക്കെ പ്രതികരിക്കും? പെട്രോള്‍ മാത്രമല്ല, ഉടനെ തന്നെ ഡീസല്‍, പാചകവാതകം എല്ലാത്തിനും വില കൂടുവാന്‍ പോകുന്നു. രാഷ്ട്രീയ പാര്‍ട്ടികളുടെ പ്രധിഷേധം അവരവരുടെ നേട്ടങ്ങള്‍ക്ക് വേണ്ടി മാത്രം. മമതയുടെ ഉമ്മാക്കിയും മലക്കംമറിച്ചിലും നമ്മള്‍ കണ്ടുകഴിഞ്ഞു. ഒറ്റപ്പെട്ട പ്രതികരണങ്ങള്‍ക്ക് ഒന്നും ഒരു  വിലയും ഇല്ല എന്നറിയാം. എന്നിരുന്നാലും അഭിപ്രായം രേഖപ്പെടുത്തുവാനുള്ള സ്വാതന്ത്ര്യം ഉണ്ടല്ലോ...... അതുകൊണ്ട് രണ്ട് വാക്ക് എഴുതി എന്ന് മാത്രം .....

സത്യന്‍ അന്തിക്കാടിന്.....

     സത്യന്‍ അന്തിക്കാട് എന്ന സംവിധായകനെ ഏതാണ്ട് എല്ലാ മലയാളികള്‍ക്കും തന്നെ ഇഷ്ട്ടമാണ്. അതുപോലെ തന്നെ അദ്ദേഹത്തിന്‍റെ സിനിമകളേയും. കാരണം അദേഹത്തിന്‍റെ സിനിമകള്‍ക്ക് എല്ലാം തന്നെ ചില പൊതുസ്വഭാവങ്ങള്‍ ഉണ്ടായിരിക്കും. അതായത്, ഗ്രാമാന്തരീക്ഷത്തില്‍ ഉടലെടുത്ത് വികസിക്കുന്ന കഥ, ലളിതമായ ആഖ്യാന ശൈലി, താരതമ്യേന നിഷ്കളങ്കരായ കഥാപാത്രങ്ങള്‍, കോപ്രായങ്ങളല്ലാത്ത നര്‍മ്മ മുഹൂര്‍ത്തങ്ങള്‍ അങ്ങിനെ പലതും... ഇതെല്ലാം സാധാരണ മലയാളിക്ക് ഇഷ്ട്ടവുമാണ്. അതുകൊണ്ട് തന്നെ അദേഹത്തിന്‍റെ കരിയറില്‍ പരാജയങ്ങള്‍ തീരെ കുറവുമാണ്. പിന്നൊരു കാര്യം പതിവ്‌ സിനിമാക്കാരുടെ തലക്കനം ഒന്നുമില്ലാത്ത ഒരു സാദാ അന്തിക്കാട്ടുകാരനാണ് ഇപ്പോഴും അദ്ദേഹം എന്നുള്ളതാണ്. ഒരു സിനിമ കഴിഞ്ഞു അടുത്ത സിനിമക്കായി യാതൊരു ധൃതിയും കാണിക്കാതെ നല്ല സബ്ജക്ട് ഒത്തു വരുന്നത് വരെ തന്‍റെ കൃഷിയും നാടുമൊക്കെയായി ഒതുങ്ങി കഴിയുന്ന മനുഷ്യന്‍.

    ഇതെഴുതാന്‍ പ്രേരിപ്പിച്ചത് അദ്ദേഹത്തിന്‍റെ സമീപകാല ചിത്രങ്ങള്‍ കണ്ടിട്ടാണ്. ഒരു നല്ല സംവിധായകന്‍ ഒരു നല്ല എഴുത്തുകാരന്‍ ആകണമെന്നൊന്നുമില്ല. അതുപോലെ തിരിച്ചും. എഴുത്തില്‍ താനൊരു സംഭവം ആണെന്ന് ആരോ അദ്ദേഹത്തെ തെറ്റായി പറഞ്ഞ് ധരിപ്പിച്ചിരിക്കുന്നു എന്ന് തോന്നുന്നു ഇപ്പോഴത്തെ അവസ്ഥ കണ്ടിട്ട്. കെട്ടുറപ്പുള്ള ഒരു തിരക്കഥ ഉണ്ടാക്കുന്നതില്‍ അദ്ദേഹം പരാജയപ്പെടുന്നു. സംവിധാന മികവ് കൊണ്ട് (താരപ്പൊലിമ കൊണ്ടും) അതേ സിനിമ വലിയ പരിക്കില്ലാതെ രക്ഷപെടുകയും ചെയ്യുന്നു. അതോ സത്യന്‍ അന്തിക്കാട് എന്ന സംവിധായകനോടുള്ള ഇഷ്ട്ടം കൊണ്ട് മലയാളി പുതുതായി എന്തൊക്കെയോ പ്രതീഷിച്ച് വീണ്ടും തീയേറ്ററില്‍ കയറുന്നോ? എങ്കില്‍ അടുത്തിടെ അദ്ദേഹം പ്രതീക്ഷകള്‍ തെറ്റിക്കുകയാണ് എന്ന് പറയേണ്ടി വരും. സത്യന്‍ സിനിമകള്‍ ഒരേ റൂട്ടില്‍ ഓടുന്ന ബസുകള്‍ പോലെ ആണെന്ന് അടുത്തിടെ സലിം കുമാര്‍ പറഞ്ഞത് ഈ സമയത്ത് ഓര്‍ത്തു പോകുന്നു. രസതന്ത്രം മുതലുള്ള അദ്ദേഹത്തിന്‍റെ സിനിമകള്‍ എടുത്തു നോക്കിയാല്‍   ഇത് വായിക്കുന്നവര്‍ക്കും എതിരഭിപ്രായം ഉണ്ടാകാന്‍ വഴിയില്ല. 

    ഒരേ പാറ്റേണില്‍ ഉള്ള സിനിമകള്‍ മാത്രമേ തന്നേക്കൊണ്ട് പറ്റൂ എന്ന് അദ്ദേഹം തന്നെ സമ്മതിക്കുന്ന കാര്യമാണ്. അല്‍പ്പമൊക്കെ മാറിയപ്പോള്‍ പരാജയവും മണത്തിട്ടുള്ളതാണ്. ‘പിന്‍ഗാമി’ ഒക്കെ ഉദാഹരണം. എങ്കിലും ഒരേ കാര്യങ്ങള്‍ തന്നെ മറിച്ചും തിരിച്ചും ഇട്ട് എത്ര നാള്‍ മുന്‍പോട്ട് പോകുവാന്‍ പറ്റും? (വലിയ ബോറടിപ്പിക്കാതെ അവതരിപ്പിക്കുന്നുണ്ടെങ്കില്‍ കൂടിയും) സത്യന്‍ സിനിമകളിലെ ഗാനരംഗങ്ങളും കഥാപാത്രങ്ങളും ഒക്കെ അദേഹത്തിന്‍റെ  തന്നെ മറ്റു പല സിനിമകളേയും ഓര്‍മ്മിപ്പിക്കുന്നു അടുത്തിടെ. മോഹന്‍ലാലും സത്യന്‍ അന്തിക്കാടും ഒന്നിക്കുന്നു എന്നോക്കെയുള്ള വാര്‍ത്തകള്‍ പ്രേക്ഷകര്‍ക്ക് ഒത്തിരി പ്രതീക്ഷകള്‍ നല്‍കും എന്ന കാര്യത്തില്‍ സംശയം ഇല്ല. കൂടാതെ മോഹന്‍ലാലിന്‍റെ മുന്നൂറാമത്തെ സിനിമ എന്ന പ്രത്യേകതയും. പക്ഷേ പടമിറങ്ങിയപ്പോള്‍....... നനഞ്ഞ പടക്കം ആയിരുന്നു എന്ന് പറഞ്ഞാല്‍ ഒരുപക്ഷേ യോജിക്കാത്തവരും ഉണ്ടാകും. സത്യന്‍ സിനിമകള്‍ ഇമ്പമാര്‍ന്ന ഗാനങ്ങള്‍ക്കും മനോഹരമായ ഗാനരംഗങ്ങള്‍ക്കും പേര് കേട്ടതാണ്. ഇവിടെ ആ കാര്യത്തിലും നിരാശ മാത്രം.

    ഇത് ‘സ്നേഹവീട്’ സിനിമയുടെ റിവ്യു ഒന്നും അല്ല. പൊതുവായ കാര്യം പറഞ്ഞു എന്നേ ഉള്ളു. അതുകൊണ്ട് സത്യന്‍ സാര്‍, താങ്കളില്‍നിന്നും ഇനിയും മലയാളികള്‍ ഒത്തിരി പ്രതീക്ഷിക്കുന്നു. ശ്രീനിവാസനേപ്പോലുള്ളവരെ കിട്ടുന്നില്ലെങ്കില്‍ നല്ല എഴുത്തുകാരെ കണ്ടുപിടിച്ച് അവരുടെ തിരക്കഥയില്‍ നല്ല നല്ല സിനിമകള്‍ ഇനിയും സംവിധാനം (മാത്രം) ചെയ്യുക. അല്ലെങ്ങിലും വര്‍ഷത്തില്‍ ഇത്ര സിനിമകള്‍ ചെയ്തിരിക്കണം എന്ന ദുര്‍വാശി ഒന്നും പണ്ടേ ഉള്ള ആളല്ലല്ലോ അങ്ങ്. നീണ്ട ഇടവേളകളില്‍ ഇറങ്ങുന്ന സത്യന്‍ സിനിമകളില്‍ പ്രേക്ഷകര്‍ക്ക്‌ വലിയ പ്രതീക്ഷ ആണ് ഉള്ളത്. ആ പ്രതീക്ഷ താങ്കള്‍ തെറ്റിക്കില്ല എന്ന് പ്രതീക്ഷിക്കുന്നു. IV ശശിയുടേയും, ഫാസിലിന്‍റെയും ഒക്കെ ഇന്നത്തെ അവസ്ഥ കണ്ടിട്ടുള്ള ആശങ്ക കൊണ്ടാണ് ഇത് പറയുന്നത്. ഇനിയും നല്ല നല്ല സംരംഭങ്ങള്‍  താങ്കളില്‍നിന്നും പ്രതീക്ഷിക്കുന്നു.

മലയാള സിനിമയുടെ ദുരവസ്ഥ

    

     മലയാളം സിനിമയുടെ ഇന്നത്തെ അവസ്ഥ എന്താണ്? സമീപകാല മലയാളം സിനിമകള്‍ എടുത്തു നോക്കിയാല്‍ കാണുന്ന ദൃശ്യം എന്താണ്? കാര്യങ്ങള്‍ ഒട്ടും ആശാവഹമല്ല എന്ന് പറയേണ്ടിയിരിക്കുന്നു. മലയാള സിനിമ അക്ഷരാര്‍ഥത്തില്‍ മരിക്കുകയാണോ എന്ന് തോന്നിപ്പോകുന്നു. പ്രേക്ഷകനെ രണ്ട് മണിക്കൂര്‍ പിടിച്ചിരുത്താന്‍ പെടാപ്പാട് പെടുകയാണ് നമ്മുടെ സിനിമാപണ്ഡിതര്‍. ഒരേ അച്ചില്‍ വാര്‍ത്തെടുക്കുന്ന ഉല്‍പ്പന്നങ്ങളായി പോകുന്നു എല്ലാം തന്നെ. ഇടയ്ക്കു ആശ്വാസത്തിനായി ഒരു പ്രാഞ്ചിയേട്ടനും ഒരു ട്രാഫിക്കും ഒക്കെ വന്നുഭവിക്കുന്നു. ഭാഗ്യം!! സത്യം പറയണമല്ലോ, സിനിമാക്കാരും പഠിച്ച പണി പതിനെട്ടും പയറ്റുന്നുണ്ട്. പഴയ ഹിറ്റുകളെ പൊടിതട്ടി പുതിയതാക്കി പഴയതിന്‍റെയും പേര് കളയുക, രണ്ടാം ഭാഗമിറക്കി കുളമാക്കുക, രണ്ട് സിനിമകളെ ഒന്നാക്കുക അങ്ങിനെ പല സൂത്രങ്ങളും. എന്നാല്‍ ഒന്നും വേണ്ട വിധത്തില്‍ ഏല്‍ക്കുന്നില്ല എന്ന് മാത്രം.

പുതിയ ചിന്തകളും ആശയങ്ങളും ഉണ്ടാകാത്തത് മാത്രമാണോ പ്രശ്നം? അല്ല എന്നാണ് എനിക്ക് തോന്നുന്നത്. മലയാളിയുടെ ആസ്വാദന നിലവാരത്തിനും കുറച്ചൊക്കെ ഇടിവ് സംഭവിച്ചിട്ടുണ്ട് എന്ന് പറയേണ്ടിയിരിക്കുന്നു. സമീപകാലത്ത് വിജയിച്ച സിനിമകള്‍ എടുത്തു നോക്കിയാല്‍ അത് മനസിലാകും. പിന്നെ – ‘കൃഷ്ണനും രാധയും’ പോലുള്ള സിനിമകള്‍ മലയാളത്തിന് വേണോ? ഞാന്‍ സന്തോഷ്‌ പണ്ഡിറ്റ്‌ എന്ന ചെറുപ്പക്കാരന്‍റെ വിരോധി ഒന്നും അല്ല. അദ്ദേഹത്തിന്‍റെ ചങ്കൂറ്റത്തെ വാഴ്ത്തുകയും ചെയ്യുന്നു. ഇവിടെ ഒരു സിനിമ നിര്‍മ്മിച്ച്‌ അത് തീയേറ്ററില്‍ എത്തിക്കുക എന്നുള്ളത് മഹാഭാരതം ആണെന്നിരിക്കെ സ്വന്തമായി എല്ലാ മേഘലകളിലും കൈ വച്ച് (?) അവസാനം അത് വെളിച്ചം കാണിക്കുകയും ചെയ്തിരിക്കുന്നു. പക്ഷേ പ്രശ്നം അതല്ല, നിലവാരം ആണ്. പണ്ടൊക്കെ പാണ്ടിപ്പടം എന്ന് പുച്ഛത്തോടെ വിളിച്ചിരുന്ന തമിഴ്‌ സിനിമകളുടെ നിലവാരം എവിടെ, അരവിന്ദന്‍റെയും ഭാരതന്‍റെയും എന്ന് നമ്മള്‍ അഹങ്കരിച്ചിരുന്ന മലയാളത്തിന്‍റെ നിലവാരം ഇന്ന് എവിടെ? നല്ല സിനിമകള്‍ ഇവിടെ ഇറങ്ങുന്നേ ഇല്ല എന്ന് ഇപ്പറഞ്ഞതിന് അര്‍ഥം ഇല്ല. ഒരു രഞ്ജിത്ത്, ഒരു ബ്ലെസി അങ്ങിനെ ചുരുക്കം ചിലരിലേക്ക് ഒതുങ്ങി പോകുന്നു എന്നു മാത്രം.

      അനേകം ചവറുകള്‍ക്കിടയില്‍ ഒരു വേറിട്ട സൃഷ്ട്ടി ഉണ്ടാകുമ്പോള്‍ അതിനെ പ്രോത്സാഹിപ്പിച്ച് വിജയിപ്പിച്ച് എടുക്കേണ്ട കടമ നമ്മള്‍ പ്രേഷകര്‍ക്കും ഇല്ലേ? അവിടെ നമ്മളും പരാജയപ്പെടുന്നില്ലേ? ഇവിടെ നല്ല സിനിമകള്‍ ഉണ്ടാകുന്നില്ല എന്നുള്ള മുറവിളി മാത്രമല്ലാതെ നല്ല സിനിമകള്‍ ഇറങ്ങുമ്പോള്‍ ആരും കാശുകൊടുത്തു അത് കയറി കാണുന്നില്ല എന്ന പ്രശ്നവുമുണ്ട്. അടുത്ത കാലത്തിറങ്ങിയ ‘പ്രണയം’ ഒരുദാഹരണം മാത്രം. ചെണ്ട കൊട്ടും പാലഭിഷേകവും നടത്തുന്ന താരത്തിന്‍റെ മുഴുവന്‍ ഫാന്‍സുകാര്‍ പോലും ആ സിനിമ കണ്ടില്ല. തട്ടുപൊളിപ്പന്‍ തെലുങ്ക് പടങ്ങളുടെ ഡബ്ബ് വേര്‍ഷനുകള്‍ക്കാണ് ഇപ്പോള്‍ പ്രിയം. ഒറിജിനല്‍ ആന്ധ്രയില്‍ ഫ്ലോപ്പ് ആകുമ്പോള്‍ അതിന്‍റെ ഡബ്ബ് വേര്‍ഷന്‍ കേരളത്തില്‍ ഹിറ്റ്‌ ആകുന്നു. എന്നാല്‍ അത്തരം ഒരു സിനിമ നമ്മുടെ അഭിനേതാക്കളെ വച്ച് ഇവിടെ ഇറക്കിയാല്‍ അതും ഇഷ്ട്ടപെടില്ല.

      സിനിമക്കാര്‍ക്കിടയില്‍ സംഘടനകള്‍ ആണ് ഇപ്പോഴത്തെ മറ്റൊരു പ്രശ്നം. കൂണ് മുളയ്ക്കുന്നത് പോലെയാണ് ഇപ്പോള്‍ അതിനകത്ത് സംഘടനകള്‍. കൂട്ടായ്മകള്‍ എപ്പോഴും നല്ലതാണ്, ആവശ്യവുമാണ്. പക്ഷെ, പരസ്പരം വെട്ടി ഇല്ലാതാകാന്‍ വേണ്ടി ആകരുതെന്നു മാത്രം. പരസ്പരം ചെളി വാരിയെറിഞ്ഞു സ്വയം അപഹാസ്യരാകുന്നു അവര്‍. ഇരിക്കുന്ന കൊമ്പ് വെട്ടുകയാണെന്ന സത്യം അവരെന്തേ തിരിച്ചറിയുന്നില്ല? നടന്മാരുടെ കാര്യം പറഞ്ഞാല്‍, നാക്കിന്‍റെ നീളം കൊണ്ട് ഒരു നടന്‍ ‘ടിന്ടു മോന്‍’ എന്ന ഹാസ്യ കഥാപാത്രത്തെയും കടത്തിവെട്ടി (കു)പ്രശസ്തനായത് അടുത്തിടെ നമ്മള്‍ കണ്ടു. അങ്ങിനെ എല്ലാവരും അവരാലാകുന്ന വിധത്തില്‍ ഒരു ഇന്‍ഡസ്ട്രിയെ തകര്‍ക്കുന്നുണ്ട്. ഇതെഴുതുമ്പോഴും അടുത്ത സമരത്തിന്‍റെ വാര്‍ത്തകള്‍ വന്നു തുടങ്ങി. ഇനി മുതല്‍ സ്വന്തം ഭാഷാചിത്രങ്ങള്‍ തീയേറ്റര്‍കാര് പ്രദര്‍ശിപ്പിക്കില്ലത്രേ, അന്യഭാഷ ചവറുകള്‍ക്ക് സ്വാഗതം. കഷ്ടം തന്നെ. ഇനി കാശ് മുടക്കി ഇതൊക്കെ കാണുന്ന പ്രേക്ഷകന്‍ ഒരു കൂട്ടായ്മ്മ ഉണ്ടാക്കി ഒരു സമരം തുടങ്ങിയാല്‍ ഇവനൊക്കെ എന്ത് ചെയ്യും????  

        പിന്നൊരു പ്രശ്നം പറഞ്ഞു കേള്‍ക്കുന്നത് ‘യൂത്തിന്‍റെ അഭാവം’ ആണ്. ഇവിടെ എത്ര യൂവ നടന്മാര്‍ സ്വന്തം കഴിവ് തെളിയിച്ചു?? കഴിവ് കുറച്ചെങ്കിലും തെളിയിച്ചവര്‍ക്ക് അവസരങ്ങളും ഉണ്ട്. (ജാഡ എടുക്കാതെ നിലത്ത് നില്‍ക്കുന്നവര്‍ക്ക്). സുപ്പര്‍ താരങ്ങള്‍ക്ക് പ്രായമായതു അവരുടെ കുഴപ്പം കൊണ്ടല്ല. അവരെല്ലാം അവരവരുടെ കഴിവുകള്‍ തെളിയിച്ചവരാണ്. അവരോടു മാറി നില്‍ക്കാന്‍ പറയാതെ മത്സരിച്ചു മുന്നിലെത്തുക. അണിയറക്കാര്‍ പ്രേക്ഷകപക്ഷത്ത് നിന്ന് ചിന്തിച്ച് നല്ല കഥകള്‍ ഉണ്ടാക്കുക. അതാണ്‌ ചെയ്യേണ്ടത്. എന്തായാലും മോളിവുഡ് എന്നറിയപ്പെടുന്ന മലയാളം ഫിലിം ഇന്‍ഡസ്ട്രിക്ക് പൊതുവേ ഇപ്പോള്‍ നല്ല കാലം അല്ല എന്നു പറയേണ്ടിയിരിക്കുന്നു. ഈ അവസ്ഥ ഒക്കെ മാറുമെന്നും ഇനിയും നല്ല നല്ല സിനിമകള്‍ ഇവിടെ ഉണ്ടാകുമെന്നും നമുക്ക് പ്രത്യാശിക്കാം

മെഗാ സീരിയല്‍ മാമാങ്കം

      മലയാളം ചാനലില്‍ വരുന്ന സീരിയലുകളെക്കുറിച്ച് ഇതിന് മുന്‍പും പലവട്ടം എന്നേക്കാളും വിവരവും വിദ്യാഭ്യാസവും ഉള്ള പലരും പറയുകയും വിമര്‍ശിക്കുകയും ചെയ്തിട്ടുള്ളതാണ്. എന്നിരുന്നാലും ഇതിനെക്കുറിച്ച്‌ എനിക്കും എന്തെങ്കിലും പറയണമെന്ന് തോന്നിയിട്ട് ഒത്തിരി നാളുകളായി. ചില സീരിയലുകള്‍ യാതൊരു അന്തവും കുന്തവും ഇല്ലാതെ നീളാന്‍ തുടങ്ങിയിട്ട് വര്‍ഷങ്ങളായി. സാക്ഷര കേരളത്തില്‍ ഈ ചവറുകള്‍ കാണാന്‍ ഇഷ്ട്ടംപോലെ ആളുകളും ഉണ്ടെന്ന് ഖേദപൂര്‍വ്വം പറയട്ടെ. ഇങ്ങനെ വര്‍ദ്ധിക്കുന്ന പ്രേക്ഷകര്‍ തന്നെ ആണ് വീണ്ടും വീണ്ടും ഇത്തരം ചവറുകള്‍ ചമയ്ക്കാന്‍ അവരെ പ്രേരിപ്പിക്കുന്നതും.   

      മമ്മൂട്ടിയുടെയും മോഹന്‍ലാലിന്‍റെയും സിനിമകള്‍ കാരണം പുതുതലമുറ വഴി പിഴയ്ക്കുന്നു എന്നായിരുന്നു ഒരിടയ്ക്ക് ഇവിടുത്തെ മുറവിളി. ഈ എളിയവന്‍റെ അഭിപ്രായത്തില്‍ അവരൊന്നും ഇവിടെ ആരേയും വഴിപിഴപ്പിച്ചിട്ടില്ല. പക്ഷേ ഈ സീരിയലുകള്‍ ദീര്‍ഘകാലാടിസ്ഥാനത്തില്‍ നമ്മുടെ പുതിയ തലമുറയെ തെറ്റായ വഴി നടത്തും എന്നാ കാര്യത്തില്‍ യാതൊരു സംശയവും ഇല്ല. കാരണം, ഇപ്പോഴത്തെ സീരിയലുകള്‍ എടുത്തു നോക്കിയാല്‍ വ്യക്തിത്വം ഉള്ള കഥാപാത്രങ്ങള്‍ തീരെ കുറവാണ്, അല്ലെങ്ങില്‍ ഇല്ല എന്ന് തന്നെ പറയാം. കുടിലബുദ്‌ധികളായ സ്ത്രീ കഥാപാത്രങ്ങള്‍, വഴി പിഴച്ചവര്‍, യാതൊരു ഉളുപ്പും ഇല്ലാത്തവര്‍ (സംവിധായകനേക്കാളും) ഒക്കെ അരങ്ങുവാഴുകയാണ് അക്ഷരാര്‍ഥത്തില്‍. ഒന്നില്‍ സ്വന്തം കുട്ടിയുടെ അച്ഛന്‍ ആരാണെന്നു അമ്മയ്ക്കും പാവം കുട്ടിക്കും അറിയില്ല. ഒന്നില്‍ ഒരു സ്ത്രീ ഗര്‍ഭം ധരിച്ചിട്ട് വര്‍ഷം ഒന്ന് കഴിഞ്ഞു. ലക്ഷണം കണ്ടിട്ട് ഇനി ഒരു വര്‍ഷം കഴിഞ്ഞാലും പ്രസവം നടക്കും എന്ന് തോന്നുന്നില്ല.

      ഇവിടെ ഒരിടയ്ക്ക് സീരിയലിനും സെന്‍സറിംഗ് എന്ന ഏര്‍പ്പാട് വരാന്‍പോകുന്നു എന്ന് കേട്ടിരുന്നു. എന്തോ ഒന്നും നടന്നില്ല. അല്ലെങ്കിലും നല്ല കാര്യങ്ങള്‍ നമ്മുടെ നാട്ടില്‍ നടക്കാന്‍ സമ്മതിക്കില്ലല്ലൊ. പണ്ട് ദൂരദര്‍ശനില്‍ മധുമോഹന്‍ സീരിയലുകള്‍ പോലും ഇത്രയും ക്ഷമ പരീക്ഷിച്ചിട്ടില്ല. കാരണം അന്നൊക്കെ ചില നിയമങ്ങള്‍ ഉണ്ടായിരുന്നു. 13 എപ്പിസോഡ് ആകാവു എന്നൊക്കെ. ഇപ്പോഴാണെങ്കില്‍ അഭിനേതാക്കള്‍ക്ക് സര്‍ക്കാര്‍ ജോലി പോലെ ആണ്. ഒരു സീരിയലില്‍ മരണം വരെ അഭിനയിക്കാം. ചാനലുകള്‍ എല്ലാം തന്നെ പൈങ്കിളി ആകുന്നു. കണ്ണീരും കൈയ്യുമായി സ്ത്രീകഥാപാത്രങ്ങള്‍ മേഞ്ഞുനടക്കുന്നത് കണ്ടാല്‍ തോന്നും ഇവരൊക്കെ ജീവിക്കുന്നത് കരയാന്‍ വേണ്ടി മാത്രമാണെന്ന്. അഭിനേത്രികള്‍ കരഞ്ഞു കരഞ്ഞു മടുക്കുകയാണ്. യാഥാര്‍ത്യവുമായി പുലബന്ധം പോലുമില്ലാത്ത കഥകളും. കഷ്ട്ടം എന്നേ പറയേണ്ടൂ...... 

      ഇതിനൊക്കെ എതിരെ ഒന്നും ചെയ്യാന്‍ കഴിയില്ലേ എന്നുള്ളതാണ് പ്രശ്നം. പകല്‍ മുഴുവന്‍ പണി എടുത്ത് തളര്‍ന്ന വീട്ടമ്മയുടെ ആശ്രയം ആണ് സീരിയലുകള്‍ എന്നാണ് പറച്ചില്‍. ഒരു പരിധി വരെ ശരി ആണെങ്കിലും ഒരു കാര്യം പറയട്ടെ, വിവാദം ഉണ്ടാക്കാനൊന്നും അല്ല – ഒരു വടക്കേ ഇന്ത്യന്‍ വീട്ടമ്മ ചെയ്യുന്നതിന്‍റെ പകുതി പോലും ജോലി നമ്മുടെ കേരളത്തിലെ സ്ത്രീക്ക് ഇല്ല എന്നതാണ് സത്യം. അതൊക്കെ പോട്ടെ, നല്ലതിനെ സ്വീകരിച്ച് കൊള്ളില്ലാത്തതിനെ TV ഓഫ് ചെയ്ത്‌ അതിന്‍റെ റേറ്റിംഗ് എങ്കിലും കുറച്ചുകൂടെ? ഇത് ഒരാള്‍ മാത്രം ചെയ്തിട്ട് കാര്യമില്ല എന്നറിയാം, എന്നാലും പല തുള്ളി പെരുവെള്ളം എന്ന് പറയുന്നതുപോലെ പലരും ഇതുപോലെ ചെയ്‌താല്‍....... ഇപ്പോള്‍ വന്ന് വന്ന്‌ ദൈവങ്ങള്‍ക്ക് പോലും രക്ഷ ഇല്ല. പുരാണ കഥകളും പൊടിപ്പും തോങ്ങലും ഒക്കെ വച്ച് അരങ്ങ് തകര്‍ക്കുകയാണ്.

      ഇനി എന്തൊക്കെ കണ്ടാലാ ദൈവമേ? ആവശ്യത്തിനും അനാവശ്യത്തിനും ഒക്കെ കൊടി പിടിക്കുന്ന മലയാളി ഇതിനൊക്കെ എതിരെ ഒന്നും ചെയ്യുന്നില്ലല്ലോ. ഏറ്റവും കൂടുതല്‍ നിയമങ്ങള്‍ നടപ്പിലാകുന്ന സംസ്ഥാനമാണ് കേരളം. ഈ കൂതറ സീരിയലുകള്‍ക്കും എന്തെങ്കിലും ഒരു നിയമം വരേണ്ടത് അത്യാവശ്യമല്ലേ? തിരകഥ നേരത്തെ സമര്‍പ്പിക്കുക, ഇത്ര ഭാഗങ്ങള്‍ മാത്രമേ ആകാവൂ, നടിനടന്മാരുടെ വസ്ത്രധാരണം.... അങ്ങിനെ എല്ലാം. യോജിക്കുന്നവരും വിയോജിക്കുന്നവരും ഒക്കെ ഉണ്ടാകും എന്നറിയാം. എന്നാലും ഇങ്ങനെ കയറൂരി വിടുന്നതിലും നല്ലതായിരിക്കും. ചാനലുകളെ പേരെടുത്ത്‌ ഒന്നും പറയുന്നില്ല. എല്ലാവര്‍ക്കും അറിയാവുന്ന കാര്യം ആണ്. അല്‍പ്പം മാന്യത നിങ്ങളുടെ ഭാഗത്തുനിന്നും അത്യാവശ്യമാണ്. നിങ്ങളുടെ പിഴച്ചുണ്ടായ സീരിയല്‍ കഥാപാത്രങ്ങളെ പോലെ ആകാതിരിക്കുക....... നല്ല കഥകള്‍ വലിച്ചുനീട്ടാതെ നന്നായി അവതരിപ്പിക്കുക. പ്രേക്ഷകരുടെ ക്ഷമയെ ഒരു പരിധിയില്‍ കൂടുതല്‍ പരീക്ഷിക്കാതിരിക്കുക.